Sudario ken Lectio: Dagiti Dung-aw ni Apo Santa Maria
O DIOS AMA
Umuna nga Dung-aw
O Dios Ama, badangannak.
Taliawem kad toy kasasaad,
Ta awan naganak kaniak;
Sangsangailiak ditoy a Ciudad
Ket awan balay a pag-yanak.
Awanen di nasam-it nga asawak
A ni Jose a katulongak
Awan met ti pangitalliyawak
Kadagitoy nadam-egan nga matak
Tapno maitabon koma daytoy anak.
Nakemmo ti tinungpalna
Ket bilinmo ti sinungputna
Kaasiam ngarud unay ita
Toy nakakaasi a bangkayna
Tapno maitanem koma.
Ay, anakko a maymaysa
Ania ti aramidek kenka
Sungbatam, anakko, toy Ina Ta tapno ammona ti aramidenna
Itoy bangkaymo a nakail-ilala.
(Ay anakko, anakko unay
Initko a narayray
Umologka ala man pay
Kadagitoy taktakiagko nga agur-uray
Kenka, Anakko a nalpas a natay.)
Apaya nga di immuna, anakko
A natay toy dakkelmo
Asinno ti ayabannanto
Asinno ti makaliwliwananto
Ket awanka metten, o anakko.
Ninagandak a bendita
Idi timma-oka, o bunga
Ket kasta nga ragsak idi inyanakka
Ngem apaya a naggiddiat ita
Toy sagabaek a madama.
O Rosas, sididios a pingping
Ken mata nga ingget sileng
Agkankay la a limmitem
O Angelko a natayen
Ken nadeggang unay a bituen.
Ilala pay toy anakko
Ay, inda aya inan-ano
Daytoy ti impaay ti tao
Kadakami a nasungdo
Saan a kasta ti pannangtedko.
Anakko, anakkon a
Agmataka man, agriingka
Kitaem, anakko toy Ina
A matalipungaw, madesmaya
Iti nalaus a kapuyna.
O Jesus, Clavel a makaay-ayo
Ken rosas a nakabangbanglo
A nagukrad ditoy a kayo
Denggem dagitoy pukkawko
Ken nala-os nga unnoyko.
Ibabam kad o Santo a Cruz
Dagita sangam a nasilnog
Lumukneng ka kayo a narukbos
Ket yawat mo kaniak a yulog
Dayta bunga a naibissayot.
O Senora a katurdan
Nailangitan a kulibangbang
Ta uray ammona a pakayatan
Dagiti dawatenna a sanaang
Kaykayatna laeng piman.
JERUSALEM, JERUSALEM,
O tao, agriingka
Ket iti Diosmo agpulangka
Ket iti Diosmo agpulangka.
O KALAWAGAN
Maikadua nga Dung-aw
O kalawagan nga initko
Ken naraniag unay nga bulanko
Apaya, karaniagan a bituenko
A natalalian daydi silnagmo
Iti di maisip a tu-okmo.
O nasgang, di kad sika
Ti ragsakko ken liwliwa
Ken ubbog a pakaungaranna
Toy naldaang nga Ina
Apaya man a nadusaka.
Ay, anakko a kasam-itan
Liwliwa toy pusoc a sileleddaang
Apaya anakko, a nadusaan pay
Dagitoy dua nga dapan
A di agsarday nga impagpagnam.
O motea daytoy Ina
Ken murmuray dagitoy mata
Daytoy biagko, an-anuek ngata
No kasta nga in-maulila
Iti kakaisuna nga anakna.
Daytoy man aya sarmingko
Ti tungpal ken banagmo
Naabutan man aya, anakko
Dagitoy nalinis unay a dakulapmo
Gaput’ pannubbotmo kadagiti tao.
Namulitan man aya, O anakko
Daydi naurnos unay a buokmo
Iti dara nagtitipkel napalalo
A gapuanan si-it a balangatmo
Nga inkeddeng ni Pilato.
O kasam-itan a Jesusko
Naduyok pay aya, anakko
Toy napateg unay a bakrangmo
Ta kas napigsa nga alinono
Ti agayos a dara a napalalo.
O initk, ay inton ano pay
Umologka, ala man pay
Kadagiti taktakkiagko a sirupy
Tapno arakupennaka toy Inam
A sangitna ti di agsarday.
O Jesus, rosas a kalasbangan
A nagukrad ditoy kayo a karukbosan
Denggem kad toy umatiparaw
A naldaang unay nga Inam
Ta angesna ti kas maipusay.
O Kristiano, agmataka
Riingem ta daram ket agmumurayka
Kitaem ti Diosmo a silalansa
Naibaet kadagiti mannanakaw a dua
Tapno ipulangnaka iti Gracia.
JERUSALEM, JERUSALEM,
O tao, agriingka
Ket iti Diosmo agpulangka
Ket iti Diosmo agpulangka.
O MORTAJA
Maikatlo a Dung-aw
O mortaja a naikawwes
Itoy anakko nga ilaklaek
Ipapasna kadakay daytoy agek
Toy Ina a silaladingit
A matay iti sasaibek.
O maymaysa nga anakko
Ania ngata ti aramidento
Toy inam a nagibus ti dungngo
Tapno maguped ti sangsangitko
Iti isisinam, ipupusaymo.
O naraniag unay nga initko
O ay-ayatek a Jesusko
Bumangonka, ala, anakko
Yata adda dagitoy taktakkiagko
Nga umarakup iti tu-okmo.
O anakko apaya man
Nga di toy Inam ti immuna a natay
Ta awanka metten a manaranay
Asinonto kad pay iti innak ayaban
A kas kenka nga ilalaek unay.
Ay amangan a rigatko nga agis-isip
Kadagiti linak-ammo nga ulpit
Nadudog toy bagim iti saplit
Asino ti liwliwak itoy a pa-it
Nga impaay dagiti mangidadanes (naulpit)*.
Ay, O balangat a kakaruan
Nga siit a katarumamisan
A makapaladingit itoy Inam nga inulilam
Dagitoy matak di maugotan
Kadagitoy luluak a nalausan.
Daytoy man aya ti nagbanagan
Daydi nakaranraniag (nakaur-urnos)* a rupam
Ta nagagaran ti dandanar
Ay, anakko, ay-ayak pay
Nga agis-isip iti inka linak-am.
O anakko a mannakabalin
Dagita matam inka bistraden
Tapno toy Inam inda perngen
Ta matalipungao a maidukem
Iti ladingit nga ingget sa-em.
O lawag a kimmudrep
Ken sayaat a naidadanes
Kaska man init a limmidem
A nakayammutan iti ulep
Ay anakko nga ingget lasbang. (Ay asi-ak pay nga agis-isip.)*
O nadiosan unay a tanem,
Tanem toy anakko a mannakabalin
Panawan kay itan, ket inkay laglagipen
Toy sileleddaang a ingget sa-em
Gaput (itoy)* tuok nga inka lak-amen.
O ay, gibusnan, itan ket gibusnan
Ti innnak kenka pannakakitan
Ta ditoy tanem ket ibatikan
Kaasiannak, anakko ket agawidkan
Ta liwliwaem, koma toy Inam.
Bumangonkan, anakko, bumangonkan
Agriingka kadin, ket agmurmuray kan
Ta iwaras mo, anakko dagita matam
Itoy ayanmo, a laguertam *
A nagtuokam iti nag____ .*
JERUSALEM, JERUSALEM,
O Virgen Maria, a nadunggo
Pedpedem ta ladingitmo
Agriingka, o tao
Ket agpulangka iti Diosmo.
O SUDARIO
Maikapat a Dung-aw
Ay, O Sudario ni Veronica
A nakaipintaan ti tallo a sinanrupa
Yasidegmo man, ta agkak ida
Dagiti ladawan a naipinta
Daydi anakko a binunga.
O ay-ayatek a bul-lalayaw
Sadinon aya ti napanam (papanam)*
Ay, anakko matmatannak man
Iti ladingitko a diak maturdan
Iti ipupusaymo, isisinam.
Kaanonto pay ngata nga oras
Ti panagsublim ditoy arpad
Toy inam a napnuan rigat
Ket awan ammok nga makaabbat
Ti ladingitko no awanka a makitak.
Ay, O rupa nga ingget pateg
Naemma nga naulimek
Awatem, anakko daytoy agek
Tapno adda liwliwak nga agsasaibbek
No sika, anakko ti pampanunotek.
Ay, O andas a nakailuganan
Ti anakko a nakalkaldaang
Ti ipapanawmo (ipupusaymo)*, diak magawidan
Ket ita agan-anoak to pay
Iti inka kaniak ipupusay.
Luktam anakko ket luktam
Dayta andas a naglas-udam (nakailas-udam)*
Ta umayak met koma lumugan
Tapno innak laeng mingmingan (Tapno agnanayon nga innak mingmingan)
Ta ingget sin-aw (unay) a rupam.
Ay, ta diak maibtur sa
Ti ut-ut ken sanaangna
No awanka a makaliwliwa
A makadepdep kadagitoy lulua
Toy inam a maulila.
Matmatam man, O anakko
Dagitoy agdama a tuokko
Yata Inam toy agsasao
Ta patgam toy arararawko
Ta luktam koma ta tanemmo.
Ay, O tanem a nadiosan
Daga a binendisionan
Ti Dios a mangisalakan
Dios ti agbati, innaka panawan
Toy Inam a sileleddaang.
Ay, O anakko, agpakadaakon
O nabanglo unay a sabong
Dios ti agbati, andas ken lungon
Ket salaknibanyo nga agnanayon
Ti bangkayna a sumina ditoy lubong. (Ti bangkay a simminad’toy lubong.) *
JERUSALEM, JERUSALEM,
O tao, agriingka
Ket iti Diosmo agpulangka
Ket iti Diosmo agpulangka.
AY, APAYA UNAYEN
Maikalima a Dung-aw
Ay, apaya unayen ti rigatna
No pampanunotenka, O bunga
Ta kas makatawen ti kaarigna
Ti oras a maymaysa
A panagpaspasungadko kenka, O bunga.
O anakko bumangonka
Darasem ket agallegka
Agungarka uray no natayka (Agungarka, agbiagka pay koma)*
Tapno maliwliwa koma daytoy Ina
Iti ladingit ken leddaangna.
O rosas, nalibnos a pingping
Ken mata a kimmidem (sikikidem)*
Agkan kay pay a limmitem
Ay anakko, ania ti innak aramiden
Iti kastoy nga innak sagabaen.
Daytoy (man) aya ti balesna
Ti panangpaspasusok kenka, O bunga
Ladingit ket itan ti subalitna
Daydi ragragsakmo a nagpaiduma
O anakko a maymaysa.
Daytoy aya, anakko ti supapak
Daydi salun-atmo ken ragragsak
Daytoy aya ti magungunak
Kastoy man aya, (anakko) ti maisukat
Iti panagtagtagibik a nabaybayag.
Inub-ubbaka idi ubingka pay
Ket kastaka a nagrayray
Ket ayatko ti dakkel unay
Anakko a makalinglingay
Ngem itan, addaka metten a natay.
O anakko a nasayaksak
Liwliwak ken ragragsak
Ay, napanan (addakan) dita andas
Sumublika pay koma kaniak
Nga man aya, anakko, a panawannak.
O sagrado a nainggasatan
O tanem a nakaipempenan
Iti Dios ti agbati kenkan
Toy anakko salaknibam
Ti bangkayna a nagloriaan.
Ay, Apok ket Diosko
Nasam-it nay ket nadunggo
Diak agduadua iti ayatmo
Sadino ita ti ayanmo
Ta kayatka koma a kasao.
Tulongannak, Apo itoy rigatko
A maipuon itoy Anakmo
A ni ay-ayatek a Jesusko
A natty a maigapu
Iti pinagtungpalna ti bilinmo.
JERUSALEM, JERUSALEM,
O tao, agriingka
Ket iti Diosmo, agpulangka
Ket iti Diosmo, agpulangka.
O SEPULCRO
Maikanem a Dung-aw
Ay, O Sepulcro nga ingget pategna
Sika natagengteng a daga
A pinili a pagdagusanna
Toy anakko a maymaysa
Sapay aya a batiem toy Ina.
Ay, gibusna itan ket gibusnan
Ti innak kenka pannakakitan
Ta ditoy tanem ket ibatikan
Kaasiannak, anakko ket agawidkan
Ta liwliwaem koma daytoy Inam.
Ay, bumangonka, anakko, bumangonka
Agriingka kadin ket agmurmurayka
Ta iwarasmo, anakko, dagita matam
Iti daytoy a laguerta
Toy ayanmo a madusa.
Ay, O patgek unay nga anakko
A sapsappuyotek iti dungngo
Awan ti kaasping ken kapadpadmo
Itoy agdama a malak-ammo
A rigat nga ingget karo.
Ay, O anakko, apaya unayen
Ti kastoy nga innak sagabaen
Ta toy barukongko nadagensen
Iti ladingitko a di agsardeng
Iti kastoy nga innak lak-amen.
Ay, ipapasko dagitoy leddaang
Ta naapges unay, ket nasanaang
Ay, anakko nga ingget lasbang
Sadinonto pay iti innak panuntunan
Ti kaaspingmo a kapadam.
Ay, apaya unayen ti apgesna
Ti pait, ut-ut ken sanaangna
Ti ipupusaymo, isisina
Ay, anakko, asi pay toy Ina
A nangpaspasuso, nangub-ubba.
Ay, pika a katademan
A nadarawiswis, nakasalbagan
Toy barukongmo a nagloriaan
Toy anakko a nangisalakan
Iti basol ti sangalubongan.
Adios anakko, ket panawankan
Dios ti agbati kenkan
Dawatko unay nga ulit-ulitan
Ta laglagipennak nga iraman
‘Ton makadanonka sadi Gloriam.
Kitaem, o managbasol a parsua
A pakaigapuanan ti rigatoni
Ni Jesusko a nangina
Mangrikna kay man ita
Iti lak-amenna a dusa.
JERUSALEM, JERUSALEM,
O tao, agriingka
Ket iti Diosmo agpulangka
Ket iti Diosmo agpulangka.