Ti Panagsanto Rosario
LUALO SAKBAY TI PANAGSANTO ROSARIO
KARARAG KEN APO SANTA IMMACULADA
(DEC 8: FIESTA TI IMMACULADA CONCEPCION)
O Nasantoan unay a Birhen. Inayatnaka ti Apo ket, manipud pay iti kinaagnanayon, pinilinaka nga Inana, sika a di namulitan ti bagi ken kararua, di naan-ano ti pammati ken panagayat: taliawennakam kad a nakakaasi nga agdawdawat iti pannaranaymo kadakami. Ti nainfiernoan nga uleg a nangidissuoran ti Dios iti lunodna idiay Paraiso, di laeng umingga mangsolisog ken mangparparaigat kadakami a nakakaasi nga anak ni Eva.
Sika ngarud, O Inami a day dayawen, Reyna ken mangimaton kadakami, awatem kad a siayat dagitoy a dawdawatenmi kenka, sika a manipud immuna a kanito ti pannakabukelmo binaddekam a pinis-it ti ulo ti kabusor dagiti isu amin a tattao. Sikakallaysa kenka dagiti isu amin a puso nga agpak pakaasi ken agdawdawat nga ipangagmo kad dagitoy napakumbaba nga ar-ararawmi iti trono ti Dios ket ipaaymo kadakam ti tulingmo, tapno uray inton kaanoman dikam annugotan dagiti solisog kadakam ti sairo, let iti kasta magun-odminto ti agnanayon a pannakaisalakanmi. Kasta met nga ipaaymo a ti Santa iglesia katolika ken dagiti pay met amin a pagilian a Kristiyano malasatda dagiti pagpegpeggadanda ket mabalinda a kantaen ti himno a pagyamanda iti pannakaruk-at, panagballaigi ken pannakagun-odda ti kappia.
O nadalus unay nga Emperatriz sadi Gloria, naslag a Birhen Maria nupay diak maikari a makipagdaydayaw iti Nadalus unay a pannakabukelmo, litupam kadi dagiti adu a kurangko. Dios ti agaluad kenka Maria, napusaksak nga Azucena, napilika a kas init ken naraniag a bituen sadi langit. Sika ak kakaisuna a pinarsua ti Dios a di nairaman it basol a tawid, manipud pay idi immuna a kanito ti pannakabukelmo ket iti kasta naikarikan nga Ina ti Dios Anak nga immay Timmao.
Maipuon dagitoy a sagudaymo ibilangnak kadi a maysa kadigiti annakmo m nupay diak makikari, O Ina ti kaasi, a nanggudau iti kinadalus kadagiti amin a pinarsua ti Diosk salukubannak kadi ti nainaan a mantom, dinak baybay-an ditoy daga a pagluluaan. Iragpatannak ti Grasya a masapulko, yantanay, O Inak am-ammom ngem iti siak ti rumbeng kaniak. Kasta met, Seora, nga italiawmo dagiti matam a manangngaasi kadagiti managbasol, tignayem kad dagiti matam a manangngaasi kadigit managbasol: tignayem kad dagiti puspusoda tapno agbabawida, Ket arayatem met dagiti adu a pakarigatan ti Santa Iglesia, igapum iti narayray nga ayatmo ken Jesucristo; AMEN.
PANAGIDATON ITI DI-NATULAWAN A PUSO NI MARIA
(Bulan ti Oktobre Fiestra ti La Naval)
O Maria Virjen a Mannakabalin ken Ina ti kaasi. Reyna ti Langit ken kamang dagiti managbasol, idatonmi dagiti bagbagimi ita dinamulitan a pusom. Idatonmi amin dagiti adda kadakami, amin dagiti pagraywanmi, amin a mangbukel ti kinasiasinomi, kenka yawatmi ti biag, puso ken kararuami. Kenka itedmi dagiti balbalay, kaamaan ken pagilianmi. Kayatmi nga amin nga adda kadakami ken iti likmutmi, tagikuaem ida tapno mairanudda kadagiti imbag a patauden ti nainaan a pamendisionmo.
Ket tapno daytoy a panagidaton agbanag a nabileg ken nabunga, pangabaroanenmi ta sakaanam. O Maria dagiti karkarimi idi panagbuniagmi ken idi umuna a panagkomulgarmi. Ikarimi it nalagda unay nga ipaduyakyakmi a kankanayon ken situtured amin dagiti pudno ti Nasantoan a Pammati: nga agbiagkam a kas mayannurot iti kina Cristianomi: dagiti bilbilin ti Dios ken ti Santa Iglesia ken nangnangruna ti pannakangilin ti Domingo ken dagiti fiesta a panagngilin. Kasta met nga ikarimi a bayat ti panagbiagmi ipasagepsepmi agingga ti kabaelanmi dagiti makaliwliwa nga aramid ti nakristtyanoan a relihiyon, nangnangruna ti Nasantian a Komunion. Kamaudiananna, ikarimi, O Nagloriaan nga Ina ti Dios ken naayat nga Ina dagiti amin a tattao, nga itedmi amin ti pusomi a panagserbi iti nagasat a panakadaydayawmo, tapno patalgedan ken dagdagenmi nga iti panagari ti di-natulawan a pusom, agari met ti puso ti maay-ayat nga Anakmo kadagiti bukodmi a kararua ken kadigiti amin a kararua iti ay-ayatenmi a daga ken iti amin a lubong, ditoy daga a kas sadi langit. AMEN.
MAMATIAK
Mamatiak iti Dios Ama, a mannakablin – amin.
A Namarsua ti Langit ken daga.
Mamatial met ken Jesukristo a bugbugtong nga
Anakna ken Apotayo,
A timmao iti aramid ti Espirito Santo:
Inyanak ni Santa maria Birhen.
Nagtutuok iti panagturay ni Poncio Pilato;
Nailansa iti Cruzm natay ket naitanem.
Immulog iti ayan dagiti natay
Nagungar iti maikatlo nga aldaw.
Immuli’t sadi Langit ken situtugaw ti
makannawan ti Dios Ama, a mannakabalin amin,
Aggapunto’t sadiay nga umay mangukom kadigiti
nabiag ken natay.
Mamatiak met ti Espirito Santo
Patiek met ti Santa Iglesua Catolica,
Ti panagririnnanod dagiti Sasantos.
Ti pannakapakawan dagiti basbasil.
Ket addanto met pangungar ti bagi,
Ken biag nga agnanayon. Amen.
Mamatiak iti mamaysa a Dios,
Ama a mannakabalin Amin,
A namarsua iti langit ken daga,
Ken kadagiti amin a mkita ken di Makita.
Ken iti mamaysa nga Apo, a ni Jesucristo,
Bugbugtong nga Anak ti Dios,
Nagtaod iti Ama iti sakbay ti amin a
tiempo.
Dios a nagtaud iti Dios,
Silaw a nagtaod iti Silaw,
Napaypayso a Dios a nagtaod iti
Napaypayso a Dios.
Nayanak, saan a naparsua,
Dios a kas met laeng iti Ama,
Ket gapu Kenkuana naaramid dagiti amin
nga adda.
Gapu kadatayo a tattao,
Ken gapu iti pannakai-salakantayo,
Immulog a naggaput sadi langit.
Ket nangala iti bagina
Iti tian ni Virjen Maria
Iti pannakabalin ti Espiritu Santo
Ket nagbalin a Tao.
Kasta met a nailansa iti krus gapu
Kadatayo,
Idi panagturay ni Poncio Pilato,
Nagtutuok ket naitanem.
Nagungar iti maikatlo nga aldaw
Kas palawagen dagiti Nasantian a surat.
Immulit sadi langit
Ket situtugaw iti makannawan ti Ama.
Umayto manen a sidadayag,
Tapno okumenna dagiti sibibiag ekn dagiti natay,
Ket ti pagarianna dinto agpatingga.
Mamatiak met iti Espiritu Santo
Nga Apo ken mangmangted iti Biag;
Su agtaud it Ama ken iti Anak,
Ket ti pagarianna dinto agpatingga.
Mamatiak met iti Espiritu Santo
Nga Apo ken mangmangted iti Biag;
Isu agtaud iti Ama ken iti Anak,
Ket pagrukbaban ken daydayawen
A maitimpuyog iti Ama ken iti Anak,
Ket nagsao babaen dagiti profetas.
Mamatiak met iti Iglesia a maymaysa,
Santa, Catolica ken Apostolica.
Ipadoyakyakko ti mamaysa a buniag
A pakapakawanan dagiti basbasol,
Namnamaek ti panagungar dagiti natay,
Ken ti panagbiag iti lubong a masakbayan.
Amen.
AMAMI
Amami nga adda’t Sadi langit
Madaydayaw koma ti naganmo
Dumteng koma ti Pagariam
Matungpal koam ti Nakemmo
Ditoy daga a kas Sadi Langit
Itdem kadakam ti aldaw ditoy
Ti kanenmi ti patinayon nga aldaw
Pakawanem dagiti basolmi
A kas met pammakawanmi
Kadagiti nakabasol kadakami
Dinakam met babay-an nga umannugot
ti solisog
Isalakannakam ket ti dakes. AMEN.
AVE MARIA
Ave Maria napnoka ti Grasya ni Apo Dios ti adda kenka
Sika ti nainggasatan kadagiti amin a babbai
Nainggasatan met ti bunga ti Tiyanmo a ni Hesus
Santa Maria nga Ina ti Dios
Ikakaasi nakami a Managbasol ita ken inton oras
Ti ipapataymi. Amen.
GLORIA
Gloria ti Dios Ama, Dios Anak ken Dios Espiritu Santo.
Kas idi punganay kasta met ita ken ti agnanayon
nga awan inggana. Amen.
** TI PANAGSANTO ROSARIO **
DAGITI MISTERIO
MISTERIOS A NARAGSAK
Malualo iti tunggal Lunes ken Sabado
UMUNA A MISTERIO
DAYDI PANANGIPAKDAAR NI ARCANJEL SAN GABRIEL KEN APO SANTA MARIA ITI PANAGSIKOGNA ITI ANAK TI DIOS.
Mangidaulo: Lucas 1:26-33, 38
Mangidaulo: Daytoy ti Ebanghelio ti Apo
Sungbat: Dayaw ti maipaay ken, O Apo...
PAGPAMPANUNOTAN
Nariribukan ni Maria idi inpablaak ni Archangel San Gabriel nga agsikogto ti maysa a lalaki ket panagananna iti Jesus, Anak ti kangatoan. Ngem napunas daytoy a pakariribukanna ta salinonganto ti mannakabalin a Dios. “Adtoyak nga adipen ti Apo…maaramid koma kaniak a kas insaom.” Insungbat ni Maria.
Natulnogtayo kadi met a kas ken Maria nga immannugot iti kadaklan nga awis ti panagsakripisyo para ti Anak ti Dios? Adda kadi gagartayo a maitinnulong para ti pagsayaatan ti kaadduan?
MAIKADUA A MISTERIO
DAYDI ISUSUKNAL NI BIRHEN MARIA KEN SANTA ISABEL A MASIKOG KEN SAN JUAN BAUTISTA.
Mangidaulo: Lucas 1:39-45
Mangidaulo: Daytoy ti Ebanghelio ti Apo
Sungbat: Dayaw t maipaay ken, O Apo…
PAGPAMPANUNOTAN
Nagrubbuat ni Maria nga simmarungkar iti kasinsinna nga Elizabeth a masikog idi iti anakda ken Zacarias. Nasao ni Elizabeth ken maria, “Anian a pannakidaydayawko ta umaynak sarungkaran ti Ina ti Apok?”
Nasarantatayo kadi nga bumisita kadagiti agkasapulan? Masaksakit? Adda iti pagbalodan? Adda ti Evacuation Center? Napapanglaw? Naipaspasuli?
Ti presenciatayo kadi a kas ken Maria ket makaited ti bang-ar ken ragsak ta ipadanontayo met ti Anak ti Dios kadakuada?
MAIKATLO A MISTERIO
DAYDI PANANGIPASNAY NI BIRHEN MARIA ITI ANAK TI DIOS ITI RUKIB SADI BELEN.
Mangidaulo: Lucas 2:6-12
Mangidaulo: Daytoy ti Ebanghelio ti Apo
Sungbat: Dayaw ti maipaay ken,O Apo…
PAGPAMPANUNOTAN
Idi inpasgay ni Maria ti ubing nga Jesus idiay belen, dagiti agpaspastor it away ti nakaipadamagan ti Anghel ti Api ti pannakaipasngay ti Mangisalakan…ni Cristo nga Apo
Adda kadi regta tayo a makisao kadagiti napanglaw a taga away? A kas iti Anghel, adda kadi saririttayo nga mangiwaragawag ti naimbag a damage iti kaadda ti Dios iti mismo a pagtaengantayo?
Agdardarstayo kadi a kas ken Maria nga mangidanon ken mangiparang ti Mangisalakan kadagiti nanumo, nakurapay, napaidaman ti kasapulan iti panagbiag?
MAIKAPAT A MISTERIO
DAYDI PANANGIDATON NI BIRHEN MARIA KEN MALADAGA A JESUS ITI TEMPLO SAID JERUSALEM.
Mangidaulo: Lucas 2:25-32
Mangidaulo: Daytoy ti Ebanghelio ti Apo
Sungbat: Dayaw ti maipaay ken, O Apo…
PAGPAMPANUNOTAN
Idi idaton dagiti nagannak ken ubing a Jesus idiay Templo, sinakruy ni Simeon iti ubing ket nagyaman. Adda kadi met napudno a panagyaman iti puspusotayo? Makitatayo kadi ni Jesus kadagiti manakem ket intay pagyamanan ida? Adda kad panangisakit ken panangipateg kadagiti Senior Citizens wenno babbaket ken lallakay?
Kadagiti mararaem ken napaidaman ti respeto, adda kadi panangisikkil ti karbenganda? Adda kadi panangidanon ti silaw ti pannakaammo kadagiti maawanan batang nga agsalukag, agpartuat ken mapadur-asda ti panagbiagda?
MAIKALIMA A MISTERIO
DAYDI PANNAKAPUKAW NI UBING A JESUS KEN TI PANNAKASARAKDA MET LAENG KENKUANA ITI TEMPLO, ITI BAET DAGITI MAMASIRIB TI LINTEG.
Mangidaulo: Lucas 2:41-50
Mangidaulo: Daytoy ti Ebanghelio ti Apo
Sungbat: Dayaw ti maipaay ken, O Apo…
PAGPAMPANUNOTAN
Nasarakan dagiti nagannak ti ubing nga Jesus iti templo nga makikatkattugaw kadagiti Mamaestro a Judio. Napnoan sirib ni Jesis a nagsalsaludsodanda ken nainsiriban ti sungbatna.
Nagannaktayo kadi nga mangipaidam iti adal a kapapatgan kadagiti annaktayo wenno dagiti ub- ubbing? Matuladtayo kadi ti nagannak ni Jesus nga mangsapul ti annaktayo no awanda ti sibay tayo?
Ipategtayo kadi ti pannakamuli iti annaktayo tapno dumakkelda a nasaririt ken natulnog nga agadal a kas ken ubing a Jesus?
MISTERIO A NALADINGIT
Malualo iti tunggal Martes ken Viernes
UMUNA A MISTERIO
DAYDI PANAGKARARAG NI APOTAYO A JESUCRISTO KEN PANAGLING-ETNA ITI DARA IDIAY MINUYONGAN TI GETSEMANI.
Mangidaulo: Lucas 22:39-46
Mangidaulo: Daytoy ti ebanghelio ti Apo
Sungbat: Dayaw ti maipaay ken, o Apo…
PAGPAMPANUNOTAN
Adu ti temporary nga agkarkararag ngem adda ngata baeltayo a mangibiag dagita a kararagtayo? Napnuantayo kadi iti talek ken pammati ken Apo Dios babaen ti panagkararagtayo> ket no agkararagtayo isu koma met iti gundawaytayo nga maliklikan iti basol. Panagkarkararag nga buyogan ti nasayaat nga aramid, gapuen ta ti panagkararag ibunga ti panangaywan ti Dios iti amintayo ket maiyadayotayo iti amin a pagbasolan.
MAIKADWA A MISTERIO
DAYDI PANNAKASAPLIT NI APOTAYO A JESUCRISTO A SIRARAKED ITI MONMON A SINGIT.
Mangidaulo: Marcos 15:6-15
Mangidaulo: Daytoy ti Ebanghelio ti Apo
Sungbat: Dayaw ti maipaay ken, O Apo…
PAGPAMPANUNOTAN
Sakit ken rigat iti inaklon ni Hesus iti pannaksaplitna. Nasaplitan gapuen iti gura. Nasaplitan gapuen iti panangururumen ti pada a tao. Nasaplitan gapuen ti basol. Maysatayo kadi kadagiti rason ti pannakasaplit ni Hesus? Maysatayo kadi nga rason ti panangparigat ken Hesus? Iti pannakasaplit ni Hesus ket binalon na gapuen ti ayatna kadatayo. Mariknatayo koma tay sakit ke rigat ni Apo Hesus a kas makikaysa iti ayat.
MAIKATLO A MISTERIO
DAYDI PANNAKABALANGAT NI APOTAYO A JESUCRISTO KADAGITI NATARUMAMIS A SISIIT.
Mangidaulo: Marco 15:16-19
Mangidaulo: Daytoy ti ebanghelio ti Apo
Sungbat: Dayaw ti maipaay ken, o Apo…
PAGPAMPANUNOTAN
Iti korona a siit iti sibolo a kas maysa nga Ari ni Hesus iti sangalubongan. Adu man dagiti paka-allilawan ti pammati no maminsan, maysan to laeng koma iti Agari, ni Hesus laeng. Saan koma nga dagitay material nga banag ditoy lubong iti agari ti biagtayo, kuarta, alikamen, career ken gura ket ni Hesus ti pudno nga agari kadatayo. Ta no ni Hesus iti agari iti biagtayo mapno tay ti ayat, panagpipinakawan ken kappia, ni hesus ti surotentayo nga Ari.
MAIKAPAT A MISTERIO
DAYDI PANAGBAKLAY NI APOTAYO A JESUCRISTO ITI INGGET DAGSEN A KRUS NGA NAGTURONG ITI BANTAY KALBARYO.
Mangidaulo: Lucas 23:26-32
Mangidaulo: Daytoy ti ebanghelio ti Apo
Sungbat: Dayaw ti maipaay ken, o Apo…
PAGPAMPANUNOTAN
Ti panagbaklay ni hesus ti Krus ket isu iti panangibaklayna kadatayo a kas annak ti Dios. Panangibaklay kadagiti gundaway nga awan iti tiempotayo nga agkararag ken makimisa. Panangibaklay ti tiempo nga napnoantayo ti basol. Maawistayo koma nga mangibaklay iti krustayo iti biag tapno masurottayo ni Hesus iti pagturongan isu iti lawag, lawag a mangted iti biag, ayat ken kappia.
MAIKALIMA A MISTERIO
DAYDI NADAWEL A PANNAKAILANSA KEN IPAPATAY NI APOTAYO A JESUCRISTO ITI KAYO TI KRUS.
Mangidaulo: Juan 19: 18-30
Mangidaulo: Daytoy ti ebanghelio ti Apo
Sungbat: Dayaw ti maipaay ken, o Apo…
PAGPAMPANUNOTAN
Datayo iti rason iti pannakailansa ni Hesus ken ti ipapatayna, makikaysatayo iti ladingit ni Maria. Ni Hesus saan a simmardeng nga nagayat ket indatonna iti biagna gapu kadatayo no ket adda lang dita aginnga nga idantonna ti biagna para kadatayo. Punoen tay ngarod koma iti pammati ken namnama ti pusotayo ta gapuen iti pannakatay ni Hesus maiturongtayo iti lawag ti pagarianna.
MISTERIOS A NAGLORIAAN
Malualo iti tunggal Miyerkoles ken Domingo
UMUNA A MISTERIO
DAYDI PANAGUNGAR NI APOTAYO A JESUCRITO KADAGITI NATAY.
Mangidaulo: Marcos 16:1-7
Mangidaulo: Daytoy ti Ebanghelio ti Apo
Sungbat: Dayaw ti maipaay kenka, o Apo…
PAGPAMPANUNOTAN
Ti nagungar nga Hesus ipakitana nga pinrmekna ti basol ken patay. Ni Hesus ket insalakannatayo ti basol ken demonyo. Itdem kadakami ti Silaw ken ti Suhat a managkararag, agdawattay ken Apo Santa Maria ti natibker a pammati.
MAIKADWA A MISTERIO
DAYDI NAGLORIAAN A YUULI NI APOTAYO A JESUCRISTO SADI-LANGIT A SIBABAGI, SIKAKARARUA KEN SIDI-DIOS.
Mangidaulo: Lucas 24:50-53
Mangidaulo: Daytoy ti ebanghelio ti Apo
Sungbat: Dayaw ti maipaay ken, o Apo…
PAGPAMPANUNOTAN
Apo Hesus saanmo apinanawan dagiti Apostoles ngem inikkam ida ti ragsak nga naimtang ti nagloria-an a yuulim sadi langit. Kalpasan ti yuulim sadi langit, pinaruburam amin a mamati kenka ti sagut nga umawat iti nasantoan a Eukaristia. Agtalekkam kenka. Apo Birhen Santa Maria, itedmo kadakam iti sagut ti namnama.
MAIKATLO A MISTERIO
DAYDI YUULOG TI DIOS ESPIRITU SANTO KADAGITI APOSTOLES AGRAMAN KEN APO SANTA MARIA.
Mangidaulo: ARAMID 2:1-7
Mangidaulo: Daytoy ti ebanghelio ti Apo
Sungbat: Dayaw ti maipaay ken, o Apo…
PAGPAMPANUNOTAN
Apo Jesucristo, ibaonmo kadakami ken umunegka ti kaunggan ti puspusomi ket paimbagennakami. Punwennakami ti ayatmo, balinennakami nga disipulosmo, dawatentayo ken Apo Santa Maria ti sagut ti napudmo nga ayat ken ti sagut ti napasnek a panagkararag. Umayka O liwliwa ket lapunusem toy pusomi ti ayat.
MAIKAPAT A MISTERIO
DAYDI PANNAKAYULI NI APO SANTA MARIA SADI-LANGIT A SIBABAGI KEN SIKAKARARUA.
Mangidaulo: Lucas 1:26-55
Mangidaulo: Daytoy ti ebanghelio ti Apo
Sungbat: Dayaw ti maipaay ken, o Apo…
PAGPAMPANUNOTAN
Ti biag ni Birhen Maria ken dagiti saan nga namulitan nga saguday na. Sapsapulenna laeng ti Dios ti amin nga aramidna. Birhen Santa Maria, ibabaetnakami. Tulongannakami ita ken inton madanon ti ipapataymi a makikaysa kenka iti nailangitan a pagarian.
MAIKALIMA A MISTERIO
DAYDI PANNAKABALANGAT NI BIRHEN SANTA MARIA A REYNA DAGITI ANGHELES, TATTAO KEN AMIN A PARSUA.
Mangidaulo: Mateo 27:27-30
Mangidaulo: Daytoy ti ebanghelio ti Apo
Sungbat: Dayaw ti maipaay ken, o Apo…
PAGPAMPANUNOTAN
Itan ta mapadayawan ti nagasat a Birhen sadiay langit, nabalangatan a kas Reyna ti Langit ken Daga. Addaantayo ti Ina sadi langit kas Reyna. Isu nga intay kumamang kenkuana. No adda dawatentayo kabayatan ti panagkarkararagtayo ti Santo Rosario, maited to kadatayo. Dawatentay kenkuana ti managayat a puso, ayat para ken Santa Maria ken Hesus. Apo Santa Maria, ibabaetnakam ken Hesus nga Anakmo. Amen.
DAGITI MISTERIO TI LAWAG
Malualo tunggal Jueves
UMUNA A MISTERIO
TI PANNAKABUNIAG NI HESUS.
Mangidaulo: Mateo 3:13-17
Mangidaulo: Daytoy ti ebanghelio ti Apo
Sungbat: Dayaw ti maipaay ken, o Apo…
PAGPAMPANUNOTAN
Ti pannakalualo daytoy a misterio, ti pannakabuniag ni Apo Jesus, ipalagipna ti pannakabuniagtayo a nagbalintayo a dungdungoen nga annak ti Dios, Anian a nakaskasdaaw a pasamak iti biagtayo idi nabuniagantayo. Agyamanto iti Apo para iti Sakramento ti buniag ta babaen daytoy a Sakramento nagbalintayo nga agkakabsat ken kristo. Mangidaulo ni Apo Hesus babaen ti pammatuladna iti panagayat iti pada a tao ken panagayat iti Ama. Agbiagtayo a kas annak ti maymaysa nga Ama ket agiinayattayo ta agkakabsattayo. Pagyamanantayo ti agut ti pammati ken itakderantayo ti pammatitayo.
MAIKADUA A MISTERIO
TI PAKASAR IDIAY CANA.
Mangidaulo: John 2:1-9
Mangidaulo: Daytoy ti ebanghelio ti Apo
Sungbat: Dayaw ti maipaay ken, o Apo…
PAGPAMPANUNOTAN
Kas ti panangibabaet ni Apo Santa Maria idi naibusan iti arak dagiti nagbuda idiay Cana, isuna ti kanayon a mangibabaet kadatayo ita iti agdama a lubongtayo Pakaseknanna a kanayon nga aramidentayo ti dawaten ni Apo Jesus kadatayo iti tunggal kanito wenno tunggal aldaw.
MAIKATLO A MISTERIO
PANNAKAIKASABA TI PAGARIAN TI DIOS.
Mangidaulo: Mateo 4:23-24
Mangidaulo: Daytoy ti ebanghelio ti Apo
Sungbat: Dayaw ti maipaay ken, o Apo…
PAGPAMPANUNOTAN
Ni Apo Hesus ipaayna ti panangngaasina kadatayo iti nadumaduma a wagas. Maysa a napintas unay a wagas a panangipakitaanna iti panangaasina ladatayo ti panangawagna kadatayp a mapn agkompesar ket pagbabawyan dagiti basbasoltayop. Iti Sakramento ti pannakapakpakawan, add ani Apo Hesus a mangted ti panangaasi. Iti Kompesar marikna ken mapadasantayo ti naragsak unay a kanito ta masarakantayo ti ayat ken panangaasi ni Apo Hesus.
MAIKAPAT A MISTERIO
TI PANAGBALBALIW TI LANGA NI HESUS.
Mangidaulo: Marcos 9:2-7
Mangidaulo: Daytoy ti ebanghelio ti Apo
Sungbat: Dayaw ti maipaay ken, o Apo…
PAGPAMPANUNOTAN
Adda met dagiti kanito ti panagrigattayo. Adda met dagiti naladingit a pasamak iti biagtayo. Iti pananglualotayo iti daytoy a Misterio, ti panagbalbaliw ti langa ni Hesus, papigsaennatayo ni Apo Hesus nga umawat kadagiti krus ti biagtayo. Ikallaysatayo kadagiti rigrigatna dagitirigrigattayo tapnmo adda pateg ken kaipapananda.
MAIKALIMA A MISTERIO
TI PANANGISUNGSONG NI HESUS TI EUKARISTIA.
Mangidaulo: Lucas 22:14-20
Mangidaulo: Daytoy ti ebanghelio ti Apo
Sungbat: Dayaw ti maipaay ken, o Apo…
PAGPAMPANUNOTAN
Gapu iti naindaklan nga ayat ni Apo Hesus kadatayo impamuspusanna ti kaaddana kadatayo it Santa Eukaristia ken ti Santisimo Sakramento. Malagiptayo ti kuna ti maysa a kanta. “Cordero ti katan-okan, nangibati pamuspusan, sakramento ti pammakawan ken eukaristia pakabiagan.” Pagyamanantayo ni Apo hesus iti daytoy ingget pateg a sagutna. Dawatentay kenkuana nga isurunotayo nga agayat ken agdayaw kenkuana.
** LITANIA NI APO SANTA MARIA **
Apo Dios Kaasiannakami
Cristomi Kaasiannakami
Apo Jesucristo Denggennakami
Jesucristo Timudennakami
Dios Ama a Nailangitan Ikakaasinakami
Dios Ama a Mangisalakan toy lubong Ikakaasinakami
Dios Espiritu Santo Kaasiannakami
Santisima Trinidad a mamaysa laeng a Dios Ikakaasinakami
Santa nga Ina ti Dios Ikakaasinakami
Santa nga Birhen dagiti Birhen Ikakaasinakami
Ina ni Jesucristo Ikakaasinakami
Ina ti Nadiosan a Grasya Ikakaasinakami
Ina a nadalus unay Ikakaasinakami
Ina a nadungngo Ikakaasinakami
Ina a di naan-anu Ikakaasinakami
Ina a di natulawan Ikakaasinakami
Ina a nakakaskasdaaw Ikakaasinakami
Ina ti naimbag a patigmaan Ikakaasinakami
Ina ti Namarsua Ikakaasinakami
Ina ti manangisalakan Ikakaasinakami
Ina ti Santa Iglesia Ikakaasinakami
Birhen a Napnuan Panunot Ikakaasinakami
Birhen a pagtamdan Ikakaasinakami
Birhen a Daydayawen Ikakaasinakami
Birhen a mannakabalin Ikakaasinakami
Birhen a Manangaasi Ikakaasinakami
Birhen a Pagtalkan Ikakaasinakami
Pagsarmingan ti Linteg Ikakaasinakami
Trono ti Sirib Ikakaasinakami
Po-un ti ragsakmi Ikakaasinakami
Baso ti Singpet Ikakaasinakami
Baso a Napili Ikakaasinakami
Baso a naisagudayan ti debosyon Ikakaasinakami
Roa a Nailangitan Ikakaasinakami
Torre ni David Ikakaasinakami
Torre a Marfil Ikakaasinakami
Balay a Balitok Ikakaasinakami
Lakasa ti Tulag Ikakaasinakami
Ruangan ti Langit Ikakaasinakami
Palpallatok ti bigbigat Ikakaasinakami
Pia dagiti Masaksakit Ikakaasinakami
Taklin dagiti Managbasol Ikakaasinakami
Liwliwa dagiti Naladingit Ikakaasinakami
Reyna dagiti Angheles Ikakaasinakami
Reyna dagiti Patriarkas Ikakaasinakami
Reyna dagiti Propetas Ikakaasinakami
Reyna dagiti Martires Ikakaasinakami
Reyna dagiti Confesors Ikakaasinakami
Reyna dagiti Sasantos Ikakaasinakami
Reyna a naita-o a di ket namulitan ti basol a tawid Ikakaasinakami
Reyna a naiyuli sadi Langit Ikakaasinakami
Reyna ti Nasantoan a Rosario Ikakaasinakami
Reyna ti Kappia Ikakaasinakami
Kordero ti Dios a mangikkat kadagiti basbasol ti lubong Denggennakam, Apo
Kordero ti Dios a mangikkat kadigit basbasol ti lubong Pakawanennakami, Apo
Kordero ti Dios a mangikkat kadagiti basbasol ti lubong Kaasiannakami, Apo
Ikakaasinakami, Santa nga Ina ti Dios…Tapno maikari kami ti inkari ni Apomi a Jesucristo
KUMARARAGTAYO
Yannugotmo, Apo Dios a dakami nga adipenmo, lak-amenmi koma iti saan nga agsarday a salon-at ti bagi ken kararuami, ket gapu ti napateg a panangibabaet ni naingasatan ken agnanayon a Birhen Maria maispal kami koma kadagiti pagel ditoy a biag, ket maragpatmi met koma dagiti ragragsak diay agnanayon a biag. AMEN.
**SALVE REYNA**
Salve Reyna Ina ti kaasi Biag san-it ken inanamami Salve, sika’t kararaganmi, dakami nga pinagtalaw nga annak ni Eva. Agpakpakaasi kami kenka a sumasinnek nga agsangsangit ditoy daga a pagluluaan. Ala koma katalekmi italliawmo kadakam dagita matam a manangaasi ket inton malpas daytoy a pammagtalaw ipakitam kadakm malpas daytoy a pammagtalaw ipakitam kadakam ni Jesus a benedito a bunga ti tiyanmo. O manangaasi, O manakem, O nasam-it a birhen Maria. Ikakaasinakami santa nga ina ti Dios tapno maikarikami ti inkarkari ni Apomi a Jesucristo. AMEN.
Mangidaulo: Kumararagtayo
Gimong: Salaknibannak Apo. Ita rabii it uray amin a dakes, O naimbag nga anghelko a tinudingan ti Dios a mangaywan kaniak, ken dakay amin nga anghels ti langit ken sasantos ti Dios, ibabaetdak.
Jesus, Maria ken Jose, yawatko kadakayo toy pusok ken kararuak.
Jesus, Maria ken Jose, umaydakto bantayan inton agbubugsotak.
Jesus, Maria ken Jose inton mauyos toy biagko awatenyonto toy kararuak.
Diosko ket Apo, manipud ita awatek a siaayat, kas naggapu ita imam, ti uray ania a kita ti patay a pagayatam nga ipaawitmo kaniak, agraman ut-ot ken sakitna.
Mangidaulo: Kumararagtayo
O Dios, a ti bugbugtong nga Anakmo, gapu iti panagbiag, ipapatay ken panagungarna, iragpatannakam kadagiti gunggona ti pannakaisalakan nga agnanayon. Dawatenmi kenka Apo nga iti panagpanpanunmotmi kadagiti Misterios ti nasantoan unay a Rosario ni Apo Birhen Santa Maria, ipaaymo a tulademi met dagiti linas-udna ket maragpatmi met dagiti inkarida, gapu met laeng ken Cristo nga Apomi. AMEN.
MEMORARE NI SAN BERNARDO
Laglagipem, O Manangaasi unay a Birhen Maria, nga uray idi kaanu man di pay nangeg a nasasao nga adda binaybay-am kadagiti kimmamang iti badangmo, nagpakpakaasi iti saranaymo, ken immawag iti tulongmo. Iti pannakapabilegko itoy a panagtalek, kumamangak met kenka O Virjen dagiti Virjenes ket inak. Iti panagsasainnekko iti bantut dagiti basbasolko, tudak ti agparang iti nadayag a saklangmo. O Ina ti Dios, dika kad ipaidam dagiti ar-ararawko ngem indengam ket aklonem ket ida a siaayat unay. AMEN.
PANAGPAKADA
Mangidaulo ken Gimong:
Saluadannaka ti Dios, O Maria, Sika nga anak ti Dios Ama.
Saluadannaka ti Dios, O Maria, Sika nga Ina ti Dios Anak.
Saluadannaka ti Dios, O Maria, Sika nga asawa ti Dios Espiritu Santo.
Saluadannaka ti Dios, O Maria, Sika a templo ti Nasantoan unay a Trinidad.
Saluadannaka ti Dios, O Maria, Sika a nabukel a di natulawan iti basol a tawid.
Mangidaulo: O Maria ken ti managayat nga Anakmo.
Gimong: Ipaayyo kadakami ti pamendisionyo. Iti nagan ti Ama, ken ti Anak ken Espiritu Santo. Amen.
O MARIA NGA IMMACULADA
KORO:
O Maria nga Immaculada, Daydayawendaka nga ikanta.
Ay awatem toy datonko kenka, nakurapay a panagkanta.
Ta sika ti pagsidsiddaawan iti amin sangalubungan.
Nabukelka a kaiimnasan, ta ti basol dika namulitan.
I.
Sika ti saranay ti maay-ay-ay
Sika’t mangpaay bang-ar ti malmalday:
Timudem kad O Ina, toy asugko kenka
Dinak kad baybay-an. Ina toy kararuak (KORO)
II.
O Ina ti Dios ti imbag, Maria a naayat
Dawatek denggennak, dikad kad baybay-an
Inton dumteng ti oras rabii ti panagbiag
Kadagita imam, ala, kibinennak (KORO)
TOY AYATKO KENKA
I.
Toy ayatko kenka, Ina sumsumged.
Innak kad aywanan tapno di maiddep.
KORO:
Ina, dinak baybay-an ditoy daga a pagluluaan.
Ina, dinak baybay-an ditoy daga a pagluluaan.
II.
Lubong, linos, dayaw amin malaylay
Toy ayatko kenka dinto agsarday. (KORO)
III.
Pangidatdatonak, kararuak, puso
Innak bukbukodan, Ina a nadungngo. (KORO)
O MARIA NALIBNOSKA
O Maria,nalibnoska, nalasbang, napintaska
Imnasmo’t awan pumada, Reyna’t langit ken daga
Toy anakmo paaklolo, ta saranay ti itedmo
Ta sika ti pagkamangan ket sika’t pakatayan
ADTOYKAM AMIN O MARIA
Adtoykam amin O Maria, siraraem ditoy saklangmo
Daytoy a pangkablaawmi kenka, denggem Ina a nadungngo.
Ave Maria O Maria, reyna ti langit ken daga
Ti puso, nakem kararuami, amin kenka idatonmi.
MARIA
Maria Inami, Ina anaasi
Nagadatka a babai, Sika ti napili
Maria, Maria, Ave Maria (2x)
Bayat inka panagbiag, panay kinaimbag
Ti Pagwadan nga insurom ken Jesus Anakmo
MARIA INAMI
Maria Inami, Ina a nadungngo, sika ti ayatmi, ragak ken rag-o
Ave, Ave, Ave Maria
Ave, Ave, Ave Maria.
O Virjen Maria, a kadalusan, Sika ti taklinmi, aklonennakam.
Ave, Ave, Ave Maria
Ave, Ave, Ave Maria.
Isurom Maria, a siaayat. Ti dalan ti panagserbimi kenka.
Ave, Ave, Ave Maria
Ave, Ave, Ave Maria.
Maria, O Reyna a nagloriaan, Awatem toy pusok ken toy kararuak.
Ave, Ave, Ave Maria
Ave, Ave, Ave Maria.
O VIRJEN TI FATIMA
O Virjen ti Fatima, ibabaetnakam
Agdawat iti kappia ken panagkaykaysa
O Ina ipakitam, ti pudno a dalan
Idatonmi nga inaldaw Santo a Rosario.
Inkarim diay Fatima tunggal agparangka
No kumamangkam kenka, tipdem buteng, gubat
O Virjen, umaykam kenka, kibinennakami
Sika’t bagnos daytoy lubong, salaknibam dagami.
AVE MARIA
Ave Maria, napnoka ti Grasya ni Apo Dios ti adda kenka
Sika ti Nainggasatan kadagiti amin a Babbai ket Nainggasatan met ti Bunga ti Tiyanmo a ni Hesus.
Santa Maria nga Ina ti Dios ikakaasinakami a managbasol ita ken inton oras ti ipapataymi. AMEN.